ប្រែសម្រួល៖ តារា
សិង្ហបុរី៖ បុរសសញ្ជាតិឥណ្ឌូនេស៊ីម្នាក់នឹងត្រូវចោទប្រកាន់នៅតុលាការ ដោយសារការចោទប្រកាន់ថាបានបង្ហាញខ្លួនអាក្រាតទៅកាន់បុគ្គលិកជាស្ត្រីនៅលើជើងហោះហើរមកសិង្ហបុរី។
នគរបាលបានឱ្យដឹងក្នុងសេចក្តីប្រកាសព័ត៌មាននៅថ្ងៃសៅរ៍ (ថ្ងៃទី៨ ខែមីនា) ថា ពួកគេត្រូវបានជូនដំណឹងអំពីឧប្បត្តិហេតុនេះនៅថ្ងៃទី២៣ ខែមករា បន្ទាប់ពីជនសង្ស័យអាយុ២៣ឆ្នាំ ត្រូវបានចោទប្រកាន់ថាបានដោះហ្ស៊ីបខោរបស់ខ្លួន និងបង្ហាញសរីរាង្គភេទខណៈពេលកំពុងអង្គុយនៅកៅអីរបស់គាត់។
ការស៊ើបអង្កេតបង្ហាញថា បុរសរូបនោះបានគ្របខ្លួនដោយភួយ និងដំឡើងទូរសព្ទដៃរបស់គាត់ក្នុងរបៀបថតវីដេអូ មុនពេលបង្ហាញខ្លួនទៅកាន់អ្នកបម្រើលើយន្តហោះជាស្ត្រីនៅពេលនាងកំពុងបម្រើអាហារដល់គាត់។
អ្នកបម្រើលើយន្តហោះបានចាកចេញពីកៅអីរបស់បុរសនោះភ្លាមៗ និងរាយការណ៍ប្រាប់អ្នកគ្រប់គ្រងរបស់នាង។
នៅពេលយន្តហោះចុះចតនៅព្រលានយន្តហោះឆាងហ្គី បុរសរូបនោះត្រូវបានចាប់ខ្លួនដោយនគរបាលព្រលានយន្តហោះ និងទូរសព្ទរបស់គាត់ត្រូវបានរឹបអូសសម្រាប់ការស៊ើបអង្កេត។
បុរសរូបនោះនឹងត្រូវចោទប្រកាន់នៅថ្ងៃទី១២ ខែមីនា ពីបទការបង្ហាញខ្លួនផ្លូវភេទ។ ប្រសិនបើរកឃើញថាមានទោស គាត់ប្រឈមនឹងការជាប់ពន្ធនាគាររហូតដល់មួយឆ្នាំ ពិន័យជាប្រាក់ ឬទាំងពីរ។
“នគរបាលចាត់វិធានការយ៉ាងម៉ឺម៉ាត់ប្រឆាំងនឹងជនល្មើសផ្លូវភេទដែលប្រព្រឹត្តអំពើអសីលធម៌ដែលបង្កការភ័យខ្លាច ភាពតានតឹង និងការបៀតបៀនដល់អ្នកដទៃ ទោះបីជានៅលើយន្តហោះ ឬនៅទីសាធារណៈក៏ដោយ” នគរបាលបានឱ្យដឹង។
“ជនល្មើសបែបនេះនឹងត្រូវដោះស្រាយយ៉ាងម៉ឺងម៉ាត់ស្របតាមច្បាប់៕”
ប្រភព៖ CNA/gr(nh)
